പ്രതീക്ഷകൾ!

       

 (വൃത്തം-നതോന്നത)

പ്രതീക്ഷകൾ തിറമാക്കാ-   

             നാശതൻ ക്ഷീരം നുകർന്നു, 

കാത്തിരിപ്പൂ പരിണാമ- 

               മറിഞ്ഞിടേണം .

ഉണ്ടനേകമായെനിക്കു   ചിന്തകൾ    

                 ചിത്തത്തിലായി,

പണ്ടുതൊട്ടുജോലിഭാരം, 

                  പിണിയാൾ വേണം. 

 'ഗൈനോയിഡു'*  ഗൃഹത്തിലെ 

      അടുക്കള ലക്ഷ്മിയായാൽ,

എന്തുസുഖമെത്രയും ഞാൻ  

         വിശ്രമം  ചെയ്യും.

'സിറി'പോല'ലക്സ'പോലെ  

          സദാനേരം   തയ്യാറാകും, 

  വരവേറ്റു നിറവേറ്റാൻ 

             കല്പനകളേ.

കൃത്രിമങ്ങൾ കാട്ടീടില്ല, 

         ദുഷ്ടലാക്കിന്നിടമില്ല,

കൃത്രിമബുദ്ധിതൻ മേന്മ  

             അവർണ്ണനീയം. 

കർത്തവ്യങ്ങളൊന്നൊന്നായി     

             ചെയ്തുതീർക്കും ശോഭയോടെ,

കാര്യക്രമമെന്നെനോക്കി

            പുഞ്ചിരിതൂകും .

ആമാശയാശങ്കകളേ, 

         സമാശ്വസിപ്പിക്കുവാനായ് 

അമാന്തംവിനാ പാചകം 

         പൂർണ്ണമാക്കീടും.

മേശയ്ക്കുള്ള മേലുടുപ്പു 

         വൈമനസ്യംകൂടാ 'ഡ്രോയ്ഡ്'

ആശപോലേ ശുദ്ധമാക്കി 

            താലം നിരത്തും.

സാധനങ്ങൾ വാങ്ങീടാനും 

          വാഹനമോടിക്കുവാനും 

ആധാരമായ് ഭവിച്ചീടും   

          ശ്രദ്ധാസമേതം.

നർമ്മമാം  സല്ലാപം വേണോ 

          ഇമ്പമായ്  സംഗീതം  വേണോ

നിർദ്ദോഷമായ് കൂടെനിൽക്കും 

        സംശയം വേണ്ടാ.

പദ്ധതിയായ് ചെയ്തുവച്ച 

           സംഗതികൾ മാത്രം ചെയ്യും

യുക്തമായ തീർപ്പുണ്ടാക്കാൻ 

            സാധിയാ ചിരം. 

യന്ത്രം നിത്യം പ്രവർത്തിക്കും 

          ബട്ടൺ ഞെക്കി കൊടുത്തീടിൽ,

തന്ത്രമതിൽ മനഞ്ഞീടാൻ 

            മാനുഷൻ  വേണം. 

 

യന്ത്രത്തിലായ് സ്വതന്ത്രത  

          കെട്ടിയിട്ടാൽ കിട്ടും ക്ലേശം,

ബന്ധനത്തിൽപ്പെട്ടുപോകും 

          മോചനം ദൂരെ. 

ഒന്നിനോടും വയ്ക്കവേണ്ടാ 

         അമിതമാമാസക്തികൾ,

മന്നിൽ വാഴുവോർക്കു 

        നല്ലൂ സ്വന്തം പ്രയത്നം.

സ്നേഹംവേണോ കിട്ടുകില്ല 

          നിർമ്മലമാംചിന്ത വേണോ, 

സ്നിഗ്ധഗാത്രയനുഭൂതി  

         പൂജ്യാങ്കത്തിലും.

മുഗ്ദ്ധപദ ഭാഷണത്തിൻ  

         ശ്രവണസുഖവുമില്ല,

മുക്തമാകാം ആഡംബര-

           ഭോഗത്തിൽ നിന്നും .

 

ഗൈനോയ്ഡ് *- യന്ത്രസ്ത്രീ

 (Gynoid- Feminine Humanoid Robot)