വന്ദിക്കുന്നേൻ പ്രഭോ!
(വൃത്തം -മഞ്ജരി)
ശ്രീപരമേശ്വരാ! വന്ദിക്കുന്നേൻ പ്രഭോ!
തമ്പുരാനേ ശംഭോ ശുഭാങ്കരാ!.
നിൻ മുന്നിലിന്നൊരു സൂനമാകാൻ മോഹം,
നിൻ ചരണത്തിൽ പതിച്ചിടുവാൻ.
ഭൂതിയേകീടുന്നു നിൻ ദർശനം ഭൂതീ!
ഭക്തിക്കുള്ള വരമേകിടേണേ
സത്യധർമ്മത്തിൻ വിചാരവികാരങ്ങൾ
രക്തത്തിൽ വന്നു നിറഞ്ഞിടേണേ .
ത്രിപ്പാദം,ഞാനെന്നും മാനസത്തിൽ വയ്പ്പൂ
മുപ്പാരിൻ നാഥാ!പരീക്ഷിക്കല്ലേ.
പ്രാർത്ഥനാഭസ്മവും തൃപ്പാദേയർപ്പിപ്പൂ,
പ്രാരാബ്ധം മാറ്റി നീ ശാന്തിയേകൂ.
ആർദ്രതാമാലേയം നൽകി നീ കാക്കണേ,
ധാര ഞാൻ ചെയ്യട്ടെ മാലു മാറ്റൂ .
ഭദ്രമാം പുഷ്പങ്ങളാക്കണേ മുള്ളെല്ലാം
നിദ്രതൻ വീഥി നീ സ്നിഗ്ദ്ധമാക്കൂ.
പീഡകളേറ്റുവാങ്ങീടും മനസ്സിന്റെ
പാടു മായിക്കൂ നീ നാഗധാരീ!
ഭക്തർക്കുമാതങ്കമൊന്നും നല്കീടാതെ
മുക്തിയേകൂതൂർണ്ണം ഭോലേനാഥാ!
മൻമനോജീവിതനൗകയ്ക്കു മുന്നേറാൻ
ഉണ്മയാം സാഗരം കാട്ടിത്തരൂ.
ക്ഷിപ്രകോപത്താൽ പരീക്ഷവേണ്ടാ,പ്രഭോ!
ക്ഷിപ്രപ്രസാദീ! അനുഗ്രഹിയ്ക്കൂ.
Comments
Post a Comment