കുറുങ്കവിതകൾ! ഭാഗം-2
1.മധുരം കളയൂ!
( വൃത്തം-തോടകം)
മധുരം കളയൂ അസുഖം കുറയും,
രുചിരം നിണവും സുഖദം ദിനവും.
മധുരം ചൊരിയും പദവും വരുകിൽ,
സുചിരം നിറയും കവനം മനമേ.
2.നാളെ!
(വൃത്തം-തരംഗിണി)
നാളെച്ചെയ്യാമെന്നൊരു തോന്നൽ
നീളേ മർത്ത്യൻ മനമതിൽ വയ്ക്കും.
നാളെയെ നീയും തേടിപ്പോയാൽ,
നാളെക്കാണാൻ പറ്റുമൊ ഭാതം. ?
3.ഇന്ന്!
(വൃത്തം-നതോന്നത)
ഇന്നിനെയിന്നാക്കിത്തന്നെ മാറ്റിടുമോമാനുഷാ! നീ?
ഇന്നു കിട്ടും മേന്മകളെ നുകർന്നിടുമോ?
ഇന്നിനെ നീ പൂർണ്ണമായി ഉപയോഗത്തെ ചെയ്തീടൂ,
ഇന്നിലുള്ള സൗരഭ്യങ്ങളൾ നുകർന്നീടൂ നീ.
4.സമയം!
(വൃത്തം-മാധുരി)
ഗേഹംതന്നിൽ വെറുതെയിരിക്കാൻ
പെണ്ണാൾക്കോ മോഹം,
പക്ഷേ സ്ത്രീകൾക്കെവിടേ കിട്ടും
സുഖിച്ചിടാൻ സമയം?
ഗൃഹത്തെ മൊത്തം പേറീടുന്നൂ
യോഷാ ശീർഷത്തിൽ,
വിടില്ല വനിതേ സദനം തെല്ലും
കൂടെ ഗമിക്കുന്നൂ.
5.ശർവരി!
(വൃത്തം- അന്നനട)
ഇരുളിൻ മാറിലായ് ശയനം ഞാൻ ചെയ്തു ,
കരിമുകിൽ രാവിൻ കരം കവർന്നെത്തീ
സുഷുപ്തിത്തോഴിയും മമ മെയ്യു പയ്യേ
ഉഷാറായി വന്നു തലോടാൻ ശ്രമിച്ചൂ.
ഉറക്കമെന്നുടെ കിടക്ക പങ്കിട്ടു,
ശർവരി പോയപ്പോൾ മുദിരം വിട്ടുപോയ്.
സുഷുപ്തിയും ഞാനും പുലർച്ചെയുണർന്നു,
ഉഷസ്സു കൈനീട്ടി കരം കുലുക്കി ഹാ!
(ശർവ്വരി- രാത്രി)
മുദിരം =മേഘം
Comments
Post a Comment